| Guía de lectura. Verán 2007 | |
 |
|||
| Volver |
|||
| PREPARA A TÚA MALETA... ...CON LIBROS DE MULLERES NOVIDADES LITERARIAS DE MULLERES Verán 2007 (Selección elaborada pola Biblioteca-Centro de documentación Alecrín) |
||||
|
Bos Aires. Unha moza emigrante española, un italiano na busca de fortuna, un mariñeiro de orixe alemá…, un baile que embebeda, o brillo do metal dun coitelo e o sangue ao fin. Bela e fantasmal, nunha milonga dalgunha cidade de Europa, unha muller seduce co seu baile a un home para despois desaparecer deixando un rastro que conduce a Bos Aires e ao pasado, a unha historia de paixón que acontece en torno a 1920. Son os tempos nos que o tango puña música á vida da cidade.
Tras un desastroso abril en París, Nanette volve á Gran Manzá na busca de traballo e calma. Pero a súa sorte muda ao recibir unha boneca de vudú, realizada pola misteriosa artista de Harlem Ida Williams. Cando Ida é asasinada a tiros no restaurante onde Nenette foi contratada para tocar, a saxofonista lánzase a investigar o escuro pasado de Ida e, sen querelo, tamén o asasinato, nunca resolto, dunha nova promesa do rap...
Nunha Florencia marcada polas convulsións
que axitaron a cidade durante a goberno de Lorenzo O Magnífico,
a capital toscana asiste á aparición dun pintor destinado
a cambiar o rumbo da historia da arte, Sandro Filipepi, apodado
dende moi xoven Boticello (o tonelete).
O día da súa morte, Julio Carrión, prestixioso home de negocios cun poder que se remonta aos anos do franquismo, deixa aos seus fillos unha fortuna considerable pero tamén unha herdanza de sombras, con moitos puntos escuros no seu pasado. No seu enterro, o seu fillo Álvaro sorpréndese pola presencia dunha muller xoven e atractiva á que ninguén recoñece. Raquel Fernández Perea, pola súa parte, filla e neta de exiliados republicanos en Francia, coñece moi ben o pasado da súa familia, e non puido esquecer o episodio máis misterioso da súa infancia, a estraña visita na que acompañou ao seu avó, recén regresado a Madrid, a casa duns descoñecidos cos que intuiu que existía unha débeda pendente. Agora o azar fará que Álvaro Carrión e Raquel Fernández Perea se coñezan e se sintan atraídos sen remedio.
Despois de vivir varios anos como inmigrante en Inglaterra, Mary Tendo regresa ao seu país natal, Uganda, onde agora é gobernanta dun gran hotel. Un día recibe unha carta de Vanessa Henman, a súa antiga patrona, unha escritora de mediana idade que lle envía unha súplica: o seu fillo, Justin, está sumido nunha grave depresión e só pide volver a ver á súa antiga coidadora. Mary intúe unha posibilidade de gañar diñeiro e accede a pasar unha tempada con eles para axudalo. Agora, baixo o mesmo teito, dúas xeografías, dúas culturas e dúas visións do mundo moi diferentes terán que convivir en pé de igualdade. Dúas persoas de forte carácter, terán que aprender a superar os seus prexuízos, a se coñecer e a se estimar. Unha aproximación ás relacións entre Europa e Africa a partir de dous retratos de muller.
O cadáver dunha muller aparece nos vestiarios dos estudios da televisión israelí. O caso é adxudicado ao inspector Michael Ohayon, que emprenderá unha complicada e sanguenta investigación polos meandros das relacións, tensións, medos e amores que teñen lugar nos corredores dos estudios. En Asesinato en directo, Batya Gur elixe como escenario do crime o lugar onde se forxa a conciencia nacional, onde se mostran as tensións políticas, os enfrontamentos, a corrupción e as divisións étnicas, sociais e relixiosas que axitan o país: a televisión do Estado.
Por moitas películas que vexamos e por moitas novelas que leamos, nunca se coñece de verdade Nova York ata que se vive dentro dela, no corazón, nas tripas dunha cidade que ás veces nos cospe e outras nos acubilla agarimosamente. New York, New York é un diario escrito co ritmo dos filmes norteamericanos e con banda sonora de Frank Sinatra. Inma López Silva combina realidade e ficción, toques de comedia e tons de desarraigamento. Sensacións, vivencias e ideas que transmite co senso do humor e o absurdo, coa linguaxe directa da vida que flúe polas rúas de Manhattan.
Un científico famoso morre en circunstancias estrañas, semellantes ás que aparecen nunha novela escrita anos atrás pola súa dona, de quen vive separado. Un dos fillos acusa á nai de ser culpable desa morte. A nai para se defender escribe unha longa carta na que analiza o papel que os distintos personaxes tiveron naquela morte. Case perfecto obriga a quen o le a tomar partido, a decidir se está asistindo ao relato dun crime “case perefcto” ou dun desgraciado suceso, produto do azar. Marina Mayoral mostra en Case perfecto a complexa trama de sentimentos que une e desune aos membros dunha familia coa que moitos lectores se sentirán identificados.
Adam Cairbough, coincidindo coas visitas frecuentes á consulta do doutor Castiñeira para tratar os seus problemas de pel, decide separarse de Eva, a muller que ama dende que chegou a Galicia. As vidas de Adam e Eva veranse sorprendidas por un cambio inesperado, que vai derrubar todo aquilo que xulgaban estable e definir quen é cadaquén. Esta novela propón a quen le unha indagación sobre esoutro sexo que levamos dentro. A reconstrución da súa identidade sexual converte as personaxes en seres máis felices, que procuran algo que ficara oculto na cotidianidade e que rematan por descubrir ao se espiren para nós.
Este volume reúne quince relatos –localizados na súa maioría nun mundo rural inclemente, pechado e opresivo- que nos fan percorrer, trala mirada dunha nena, escenas cotiás na vida dunha pequena comunidade de ascendencia suaba. O núcleo familiar, a morte, os xogos infantís, o sexo, a igrexa e a escola, o baile...vanse plasmando cunha enganosa inxenuidade que converte a realidade nun brutal pesadelo. Por riba da anécdota a natureza imponse , incluso nas breves escenas da vida urbana, en cada unha das páxinas do libro, destilando unha intensa calidade poética coa forza das súas imaxes case oníricas.
Seleccionados por unha importante cadea de televisión, doce concursantes participan nun espectacular reality show que os leva a exóticos rincóns de todo o mundo na busca de pistas para achar obxectos perdidos. Concursan por un millón de dólares someténdose ás surreslistas probas que os organizadoares prepararon e coas que pretenden facer aflorar os seus desexos e secretos máis ocultos para mostrar a súa humillación pública en horas de maior audiencia.
Mateo sería guitarrista de rock só
se deixara de gañarse a vida nunha mísera imprenta
que imprime copias piratas de Siddharta e O diario de Ana Frank.
Unha muller observa o acoitelamento e a posterior morte do seu home
pero, paradoxicamente esa morte tráxica traeralle a posibilidade
dun novo amor... Nunha Nápoles onde o mar figura moi pouco,
aínda que desprenda o seu cheiro a destinos cruzados, onde
se espera sempre a chegada dende Roma da policía para que
manteña a orde, onde o contrabando rematou e se perdeu no
norte, os protagonistas –sobre todo mulleres cos pés
na terra- agasállannos com historias auténticas. Valeria
Parrellla é a gran revelación da narrativa contemporánea
italiana .
O cambio climático condiciona a vida
na Galicia do futuro. Os exiliados resisten as temperaturas extremas
nos desertos áridos do interior, mentres os habitantes libres
do andazo sobreviven en grandes plataformas flotantes no mar, afastados
do territorio da enfermidade e supostamente amparados por unha sociedade
perfecta. Neste reduto de civilización, os sucesos fantásticos
mestúranse cos acontecementos cotiáns, facendo difícil
distinguir a realidade da ficción. Os cidadáns viven
sometidos ao control da Torre Aloia e o Capitán Silva loita
contra o uniformismo. O fío condutor da novela é a
soidade humana, alimentada polo avance da deshumanización
e o silencio nun ambiente sórdido. A obsesión dos
seus protagonistas é fuxir da canícula interior, do
pensamento único. O seu desexo é poder sentir ao fin
o recendo dunha liberdade real.
Trala morte da súa tía avoa,
a xoven Mónica herda o vello caserón familiar e decide
instalarse nel xunto co seu compañeiro, Javier e, nun futuro
próximo, coa nena da que está embarazada. Dende o
comezo das obras de remodelación da casa, acontecen nela
unha serie de fenómenos inexplicables: un cheiro nauseabundo
que invade a sala principal, repentinas baixadas de temperatura,
un gran ficus que se resitste a ser arrincado... ata que, de xeito
sorprendente, aparece um busto de mármore que representa
a Venus, a deusa romana do amor e que garda relación co escuro
segredo que esconde o lugar. Para Mónica iníciase
así unha dramática aventura que a levará a
entrar en contacto cun universo paralelo. O que separa a existencia
dos vivos da dos mortos e que a trasladará a unha vida anterior,
nos albores da nosa era, na que se produxo um crime execrable.
Desenvólvese aquí unha historia de amor que non se parece a ningunha outra. En Beirut e por Beirut –finalmente, despois dunha relación coa cidade de vinte anos de duración- a periodista Maruja Torres descubre o grado de ficción que altera a súa propia existencia e que non é outra cousa que a irrupción do increíble, o fascinante, o casual: o literario. Este achádego, que outros terían resolto cun ensaio, ela, como protagonista, como afectada, víveo como unha novela. Esta é unha historia de amor e de amores, e tamén o emocionado relato dunha agradecida rendición á única cidade onde se finxe e se vive sen notar a diferencia, gloriosamente. Beirut, amante, salvaxe fogar, mestra en texer lazos de sangue. POESÍA
Este libro habita nos recunchos da consciencia,
territorios inzados de ortigas e de herbas das ortigas. Estes poemas
medraron nas estancias abandonadas da infancia dunha nena que se
fixo grande e logo marchou para a cidade. Como entre as ruinas da
casa vella, estas imaxes, metáforas que se fan símbolos,
foron medrando entre os pensamentos da Xiana ata viriren nas palabras
que enchen este volume.
Irrompen as conversas co capitán Kraft de Oriana Méndez na poesía galega do século XXI. Esta obra aborda o texto poético como ferramenta de demolición da usura, como conflito sen resolver, como sinal de posta en marcha. Valéndose da ironía contra os fósiles líricos do noso tempo, a autora disecciona a experiencia da posmodernidade, abre túneis na metrópole continua que habitamos. E tensa o verso, confronta o seu sentido da beleza, profundo e inquisitivo, coa esixencia de franquear os pasos para a mobilización.
Este libro tenta recuperar a memoria da resistencia contra o franquismo, dende mediados dos anos 60 ata mediados dos anos 70. A autora reflicte un proceso histórico que viviu e padeceu. Foron anos de conciencia ideolóxica e repersión brutal; xa que logo, non lle era posible rememorar ese terror sen ira, non podía escribilo sen cólera. Este poemario de lembranza e recoñecemento aos impulsores da conciencia política galega non sería o mesmo escrito dende a conciencia feminista. Tería que chamarse Cóleras, xa que as mulleres sentían unha dupla indignación porque padecían unha dobre opresión.
TRADUCIÓN. COLECCIÓN AS LITERATAS
McCullers aborda o paralelismo entre as concepcións sociais estereotipadas sobre o xénero e a opresión dos negros. A novela enfatiza a crise traumática da protagonista adolescente producida pola confrontación dos perigos da feminidade. Ela síntese abanear entre a liberdade da infancia e a sexualidade rixidamente definida polos adultos á que se ve abocada. En A voda, o soño da androxinia aparece como a vía de escape dunha feminidade definida en termos restrictivos: sexualidade pasiva e submisa, e maternidade sacrificada que implica renuncia aos privilexios masculinos.
As personaxes de Rhys abanean na confrontación entre unha intimidade desconcertada e o asoballamento do mundo, que mesmo pode conducir á tolemia. En Ancho mar de argazo a autora rescata á súa protagonista da obra de Charlotte Brönte. Jean Rhys crea un deslumbrante mundo ficcional e logra presentarnos unha das mási abraiantes e desgarradas personaxes femininas de todo o século, caracterizada dende a oposición de identidades (homes contra mulleres, negros contra brancos, Europa contra América, novos contra vellos, ricos contra pobres...).
Esta obra recolle en case 2.000 entradas a historia de Galicia a través das mulleres que contribuíron á súa construción. Aurora Marco, a autora, diferencia este dicionario doutras publicacións na mesma liña xa que, no seu caso, “non é elitista, porque aparecen dende literatas a redeiras, palilleiras ou incluso soldadeiras medievais”. Co Dicionario de Mulleres Galegas pódese afondar na historia de mulleres como Maruja Mallo, artista republicana que non viu recoñecida a súa obra ata moito despois da guerra; María Casares, actriz coruñesa que se abriu paso na escena francesa ao exiliarse de España; ou Juana de Vega, escritora e presidenta da Asociación de Señoras coruñesa nos anos 50. Outras moitas mulleres representativas de Galicia teñen o seu sitio nas páxinas do dicionario de Aurora Marco. Non unicamente da escena artística e política, senón tamén mestras, periodistas, monxas...
O son das buguinas é un libro e DVD
solidarios promovidos por Implicadas/os no Desenvolvemento (IND),
unha Organización Non Gobernamental (ONG) de voluntariado
que actúa en Galicia para apoiar proxectos de desenvolvemento
integral no sur da India e Etiopía. O proxecto O son das
buguinas, xermolou como unha das respostas de IND ao tsunami do
26 de decembro de 2004 que provocou a morte de máis de 300.000
persoas na India e noutros países de Asia. IND realizou un
chamamento solidario a diverso/as narradoras/es co obxecto de editar
un libro solidario que axudase a reflexionar ao público xuvenil
galego sobre as tráxicas consecuencias desta catástrofe.
Froito daquel chamamento é O son das buguinas, un produto
editorial conformado por un libro de sete relatos (ilustrado por
Xulia Barros) e un DVD. O volume inclúe os relatos de Marilar
Aleixandre, An Alfaya, Fran Alonso , Rosa Aneiros, Agustín
Fernández Paz , María Reimóndez e Dolores Ruíz,
ademais dunha introdución, titulada “O son das buguinas”.
O DVD, que acompaña ao libro, preparado por Francisco Vila
Barros, inclúe un documental sobre o labor de IND en India
e Etiopía, unha película de animación sobre
o labor das ONGs e as políticas de voluntariado e cooperación,
un documental sobre o tsunami e un xogo interactivo sobre a cooperación.
|
| © Copyright ALECRÍN 2003 |