Grupos a quen van dirixidas as charlas e obradoiros

• Centros de ensino da provincia de Pontevedra

Destinadas principalmente a alumnas/os de idades comprendidas entre os 13 e 18 anos, con estas charlas preténdese contribuír a que a mocidade adolescente ou pre-adolescente pense e adopte unha actitude libre e responsable ante a súa sexualidade. Trátase de cambiar actitudes e de inducir inquedanzas e reflexións.

• Asociacións de Nais e Pais (ANPAS)

Coordinado polas ANPAS dos centros de ensino e a petición destas, as charlas son planificadas de xeito que propicien o debate e o intercambio entre a especialista e as nais e pais participantes. Trátase non só de proporcionar coñecemento, senón de cambiar actitudes e invitar á reflexión. Como premisa pártese do feito de que a educación sexual é un conxunto de vivencias, de aprendizaxes, de desenvolvemento físico, psíquico e sensorial, que se acumula co tempo e sobre o cal actúa o contorno, o ambiente, a cultura... e a escola, que ten un peso importante neste proceso.

Temas que se abordan nas charlas e obradoiros

• Identidade de xénero: Un camiño para a igualdade e a prevención da violencia, tanto no ámbito escolar como nas relacións de parella. Nestas charlas abárcanse os conceptos de sexo e xénero, a súa diferenza, a xénese do sexismo e a violencia: prevención de condutas agresivas entre o alumnado e na parella.

• Sexualidade: Descubrindo un mundo novo. Este obradoiro busca ofrecer un espazo para a reflexión, a aprendizaxe e o descubrimento das relacións afectivo-sexuais en toda a súa amplitude. Incídese na imaxe corporal, nos cambios físicos e psíquicos, nas relacións afectivas, etc. Orientación sexual: como detectar as distintas orientacións sexuais e como afrontalas en igualdade e con respecto, nas condutas sexuais típicas da adolescencia…

• Saúde sexual: ETS e Métodos Anticonceptivos. Céntrase na saúde sexual, como indispensable para a consecución dunha sexualidade sa, pracenteira e libre de riscos. Para isto facilítase o acceso e o coñecemento dos métodos anticonceptivos existentes, así como a conceptualización e reflexión das enfermidades de transmisión sexual, incluíndo a SIDA.

• A prostitución; Unha cuestión de todas e de todos. Estos contidos serán impartidos a partir de 3º e 4º da ESO. Incídese en que a prostitución sexa tratada como un xeito de violencia contra a muller que debe ser erradicada pois constitúe unha violación e perda dos dereitos fundamentais e a dignidade das mulleres. Este contido será abordado como obradoiro, con actividades didácticas onde as/os estudiantes reflexionen sobre o tema e debatan a partir das súas opinións.
  

Contidos que se traballan

• A educación en igualdade e para a igualdade. Pautas e cambios de actitudes.

• A sexualidade e as distintas etapas evolutivas.

• Anatomía e fisioloxía sexual. Cambios corporais e comportamentos derivados destes cambios.

• Orientacións sexuais: saber afrontar sen tabús os comportamentos sexuais.

• Condutas agresivas: como detectalas e aprender a corrixilas.

• Resolución de conflitos derivados tanto das relacións afectivo-sexuais, a saúde sexual e a convivencia en igualdade.